2 Samuël 23
01Dit binnen leste woorden van David.
Zo zegt David, Isaï zien zeun, God zien hoog verheven held,
deur God van Jakob aansteld as keunenk, Israël zien oogappel,
bezongen in laiden van Israël:
02"t Is de HEER zien gaist, dij in mie sprekt,
zien bosschop vertel ik.
03God van Israël sprekt, Israël zien beschaarmer zegt tegen mie:
'Der komt ain, dij rechtveerdeg regaaiert over ale mensken,
dij regaaiert mit ontzag veur God.
04Hai is as t mörgenlicht, as zun opkomt op n onbewolkte mörgen,
as zunnewaarmte t jonge gras op t laand wazzen dut noa n gruizoame regenbui.'
05Zo dut God wizzenzeker ook mit mien hoes.
Hai het ja veur hailtied n verbond mit mie sloten,
dij nait weer stokkend kin en altied standholdt.
Joa, aal wat k wènsk en aal mien haail,
doar geft God wasdom aan, t is zekerwoar.
06Mor minne lu, dij binnen altmoal as verwaaide stiekels,
doar je mit blode handen wel ofblieven willen.
07Dij ze oproemen wil, gooit ze mit greep of vörk op n bult,
en stekt haile boudel in brand."
08Noamen van David zien dapperste soldoaten:
Isbaäl oet Chachmon was nummer ain van de drij aldermoudegsten. Hai gong mit n speer op aachthonderd man òf en versluig ze in ainmoal.
09Nummer twij van de grode drij was Elazar, zeun van Dodo, oet Achoäch. Filistijnen haren heur ais verzoameld om slag te levern. David en Elazar doagden heur oet, mor Isrelieten knepen oet.
10 Bloots Elazar bleef stoan en haauwde der op in, alderdeegs nog dou hai kraam in haand kreeg en t sweerd nait meer lösloaten kon. De HEER gaf dij dag n grode overwinnen. Eerst dou der aans niks meer te doun was as plundern van slachtovvers, kwammen Isrelieten weer veurndag.
11 Nummer drij was Samma, Age zien zeun, oet Harar. Op n moal haren Filistijnen zok verzoameld bie Lechi. Doar was n stok laand mit linzen. Isrelieten gingen veur Filistijnen op loop,
12 mor Samma bleef midden op t laand stoan. Hai luit hom doar nait votjoagen, mor versluig Filistijnen. Zo gaf de HEER n dikke overwinnen.
13 Drij aandern van zien helden kwammen ais bie David in t begun van mennerstied, in grot van Adullam. Filistijnen haren n legerkaamp opsloagen in leegte van Refaïm.
14 David haar zok verschaansd op n stoer te benoadern stee, en lag doar nou net nait n ofdailen van Filistijnen in Betlehem!
15 David haar dörst as n peerd en zee: "Kon ain mie mor wat van dat vrizze wotter oet Betlehem hoalen, oet put bie poort!"
16 Dou broken dij drij vuurvreters deur Filistijnen heur wachtpost hèn en huilen wotter oet put in Betlehem. Mor dou ze bie David kwammen, wol hai der nait van drinken. Hai goot t op grond as ovver veur de HEER.
17 "Doar mag de HEER mie veur bewoaren," zee e, "dat ik hiervan drink. t Is ja zoveul as dat ik t bloud van dizze jonges drinken zol, zai hebben heur levent ter ja veur woagd." Doarom wol hai t beslist nait drinken. Zoks deden dij drij helden.
18 Aanvoerder van dizze drij was Abisai, Joäb zien bruier - Seruja was heur moeke. Hai ging ais mit n speer op drijhonderd man òf en versluig heur. Zo kreeg hai noam onder dij drij.
19 Hai was van heur t mainste in reken en zodounde wer hai heur aanvoerder, mor eerste grode drij, doar kwam hai nait aan tou.
20 Benaja, zeun van Jojada, oet Kabseël, was ook n eersteklas vechtersboas. Hai haar n bult heldendoaden op zien noam: zo versluig hai baaide zeuns van Ariël oet Moäb en luit hom ais in n put deelzakken doar n laiw inzat, op n dag dat ter snij lag. Hai het t ondaaier doodmoakt.
21 n Aander moal het e n Egyptenoar doodmoakt, n reus van n kerel. Man haar n spies, Benaja n stòk, mor hai scheurde hom spies oet handen en haauwde hom mit zien aigen woapen dood.
22 Zoks dee Benaja. Hai was ook vernuimd onder de twijde drij,
23 en ston nog hoger in aanzain as aander datteg, mor eerste grode drij, doar kwam hai nait aan tou. David stelde hom aan as kommedant van zien liefwacht.
24 De datteg dappern wazzen: Asaël, bruier van Joäb; Elchanan, zeun van Dodo, oet Betlehem;
25 Samma en Elika, baaident oet Charod;
26 Cheles oet Pelet; Ira, zeun van Ikkes, oet Tekoä;
27 Abiëzer oet Anatot; Mebunnai oet Chusa;
28 Salmon oet Achoäch; Maharai en
29 Cheleb, zeun van Baäna, baaident oet Netofa; Ittai, zeun van Ribai, oet Gibea in Benjamin;
30 Benaja oet Piraton; Hiddai oet Nachale-Gaäs;
31 Abialbon oet Arba; Azmawet oet Barchum;
32 Eljachba oet Saälbon; Jasen oet Gun;
33 Jonatan, zeun van Samma, en Achiam zeun van Sarar, baaident oet Harar;
34 Elifelet, zeun van Achasbai, oet Maächa; Eliam, zeun van Achitofel, oet Gilo;
35 Chesro oet Karmel; Paärai oet Arba;
36 Jigal, zeun van Natan, oet Soba; Bani oet Gad;
37 Selek oet Ammon; Nachrai oet Beërot, woapendroager van Joäb, zeun van Seruja;
38 Ira en Gareb, baaident oet Jeter,
39 en Uria de Hethiet. Dit binnen mitnkander zeuvendatteg.
|
